Sulmi kibernetik ndaj sistemit TIMS, por edhe shërbimeve të tjera online qeveritare ka vënë në alarm autoritetet, drejtuesit e të cilëve janë thirrur për të raportuar në Komisionin e Sigurisë. Pas atij tè SHISH, sot në këtë komision raporton drejtuesja e AKSHI-t, Linda Karcanaj, e cila do të japë informacione para deputetëve.
Por për shkak të të dhënave sekrete nga kryetari i Komisionit, Nasip Naço ka kërkuar që seanca të zhvillohet me dyer të mbyllura dhe pa praninë e medias. Edhe drejtuesja e AKSHI kishte te njejten kërkese, pasi siç u shpreh ajo, informacionet janë te klasifikuara se sekrete ose tepër sekrete.
“Për shkak të faktit që gjatë diskutimit do të trajtojmë informacion që është i klasifikuar, sekret ose tepër sekret unë do tju lutesha që seanca të zhvillohej pa praninë e kamerave, me dyer të mbyllura”, u shpreh drejtuesja e AKSHI-t.
Kjo kërkesë u hodh në votim, ku deputetët e mazhorancës votuan pro, ndërsa nga tre deputetët e opozitës që ishin të pranishëm, dy votuan kundër mbajtjes së seancës me dyer të mbyllura dhe njëri abstenoi. Kryetari i Komisionit të Sigurisë Nasip Naço kërkoi nga deputetët që të dorëzojnë celularët e tyre, me qëllim mos përhapjen e informacioneve, që do të jepen nga drejtuesja e AKSHI-t.
Kujtojmë që kjo është seanca e dytë dëgjimore për çështjen e sulmeve kibernetike, pasi javën e kaluar po me dyer të mbyllura dëshmoi kreu i SHISH, e cili e konsideroi situatën shqetësuese.